У викенду за нами у Руским Керестуре отримани 12. Фестивал алтернативней музики „Водова фест”, з тей нагоди нє у школско-спортскей гали, дзе бул остатнї штири роки, алє ознова на базену, месту на хторим ше преславел на самим початку, та здобул и репутацию „Мали Еґзит”.
Потим як є першираз Водова фест ше врацела на место старей слави
отримана 2007. року, Водова з рока на рок росла прицагуюци числени звучни мена зоз алтернативней музичней сцени з нашей держави и околїска, алє вше давала нагоду и локалним, менєй познатим бендом же би указали цо знаю. Зоз ростом фестивалу, росли и обчекованя, як публики так и орґанизаторох, а кулминация рижних обставинох приведла до того же фестивал на базену тирвал по 2013. рок. Павза була по 2022. рок, кед орґанизаторе надумали ожиц фестивал у школско-спортскей гали. На одредзени способ зоз тим Водовей предлужени живот, медзитим, и попри звучних бендох хтори там наступали, заш лєм то нє було то. То нє бул лєтни фестивал на отвореним, а спортска гала, без огляду на квалитетни бенди, єдноставно нє могла винєсц продукцию и квалитет звука, бо є за таке анї нє правена.
Фестивал того року конєчно отримани на добре познатим месце, та гоч на меншим просторе, лєм з єдного боку базену а нє з обидвох бокох, як було на самим початку, медзитим, тото му и дало якуш окремну, интимнєйшу красу. То лєм значело же єдна часц базену була отворена за купачох и тих хтори нє мали намиру скакац у перших шорох опрез бини, алє лєм ше прешпацирац и закукнуц, евентуално ошвижиц ше за шанком. О музичних смакох на фестивалу нє вредзи трошиц слова, верим же було и таких хторим ше нїяк нє пачел звук зоз бини, алє у тим и поента фестивалу алтернативней, а нє народней, жридловей або забавней музики. Тото цо окреме треба похвалїц то же, можебуц и од самого початку Водовей, нїґда нє було тельо вельо керестурских музичних уметнїкох, хтори медзи иншим виводзели и стари, алє добре познати поп и рок руски шпиванки. У тим можебуц и лєжи вкупни упечаток тогорочней Водовей, окреме кед ше вежнє до огляду же у публики могло видзиц як их товарише, фамелия и родзини здушнє потримую.
Гоч, у поровнаню зоз прешлима, тогорочна Водова можебуц нє була така „ґрандиозна”, заш лєм треба припознац же єй тота интимна атмосфера дала окремну красу, а нащивителє дому пошли зоз преважно позитивнима упечатками, подобно як и новинар хтори пише тоти шорики. Кед ше подцагнє смужку, зоз врацаньом на базен и численима насампредз безплатнима змистами, Водова фест ше на вельки дзвери врацела на место старей слави, а по словох орґанизаторох – ту останє и надалєй. Най би!