ВАЛЄВО/РУСКИ КЕРЕСТУР/НОВИ САД – На найвисшим змаганю рецитаторох у держави, у наймоцнєйшей конкуренциї – старшим возросту, наш познати рецитатор Мирослав Мико Малацко з Руского Керестура освоєл високе пияте место.
Републична смотра рецитаторох отримана пияток, 19. мая у Валєве, а Малацко ше у тогорочним циклусу у катеґориї штредньошколциох, студентох и младежи змагал з виривками з поеми Мирослава Антича „Писма панї Венети”, преложенима на руски. За змаганя го у Рецитаторскей секциї керестурского Дому култури пририхтовали Олена Живкович и Мая Зазуляк.
На Републичней смотри рецитаторох у Валєве у конкуренциї младшого возросту (школяре нїзших класох ОШ) з писню по руски участвовала и Катарина Накич з Нового Саду.
Катарина, школярка штвартей класи ОШ, од Городскей по Републичну смотру рецитовала писню Меланиї Римар „Мале дзивчатко”, а у новосадскей ОШ „Милош Црнянски” пририхтала ю учителька Весна Кухар.