БАЧКА ПАЛАНКА – На 9. Сайме творчосци валалских женох Войводини, хтори з нагоди Медзинародного дня валалских женох – 15. октобра отримани всоботу 14. октобра у Бачкей Паланки, участвовали коло 200 здруженя женох зоз 41 општини.
На тим Сайме општину Кула представяли Здруженє женох „Байка” з Руского Керестура, „Идеа” з Кули и „Вредни руки” зоз Крущичу, а на Сайме участвовали и жени Рускинї зоз Бикич Долу, а їх штанди нащивела и народна посланїца Олена Папуґа.
Членїци Здруженя „Байка” викладали свойо ручни роботи одн. рижни сувенири и ткани предмети, як и традицийни колачи. У провадзацей програми була вистава фоторепортерох валалских женох, видео-презентация Отворених школох едукациї о орґанскей продукциї и културно-уметнїцка програма.
Саям творчосци валалских женох Войводини орґанизовал Завод за ровноправносц полох з потримовку Покраїнского секретарияту за социялну политику, демоґрафию и ровноправносц полох АП Войводини и Општина Бачка Паланка.
Медзинародни дзень валалских женох запровадзени з резолуцию Зєдинєних нацийох 2009. року з цильом же би ше указало на вельке доприношенє женох на валалє и їх ключну улогу у унапредзеню польопривреди и руралного розвою.
