КОЦУР – У рамикох гуманитарней акциї з хтору ше збера пенєж за операцию очох школяра другей класи ОШ „Братство єдинство“ Желька Шанту з Коцура, перше нєшка на вечар у Школи будзе гуманитарна журка за школярох висших класох ОШ, а на нєдзелю, 28. мая на 20 годзин у Доме култури будзе отримана гуманитарна програма. Желько на операцию очох муши пойсц до Русиї, за цо му потребни 3 000 еври.
Место уходнїцох, по 100 динари буду предавани ручни роботи коцурских школярох за помоц Желькови, а орґанизаторе тей гуманитарней програми коцурске здруженє младих „КУМ“ и ОШ „Братство єдинство“.
Попри коцурскей, до акциї ше уключели и други школи у верабскей општини и ширше, як и културни и спортски здруженя у Коцуре, а у шицких предавальньох СТР „Любоєвич“ поставени шкатули до хторих Коцурци можу охабиц добродзечни прилог за Желька.
Тиж так, и шицки людзе добрей дзеки, без огляду з хторого су места, поволани най ше уключа до тей акциї збераня пенєжу нєобходного за Желькову операцию, а донацию мож уплациц на жиро-рахунок Желькового оца: Тихомир Шанта, Банка Интеса: 160-5800101032234-53.