РУСКИ КЕРЕСТУР – На базену у Руским Керестуре ЯКП „Руском” поставело три нови столи и по два лавки ґу каждому, ґу уж постояцим двом комплетом котри пооправяни на роботней акциї прешлого тижня.
У рамикох истей роботней акциї заменєни и поламани латки на лавочкох коло базену котри пред даскельо роками преселєни зоз центру валала, та уж єст и поламани нови латки, цо указує наисце нє таку красну слику о нашим одношеню ґу явному маєтку.
– Пред тижньом зме оправяли лавочки, а нєшка уж видзиме же єст нови поламани латки на нїх. Нєшка нашо роботнїки поставяю тоти три нови комплети котри буду на хасен шицким гражданом валалу. З тей нагоди, модлїме шицких же би мерковали и чували тото цо маме, та же би после хаснованя и пребуваня на базену за собу позберали шмеце – толкує директор Рускому Иґор Фейди.