СТАРИ ЯНКОВЦИ (ГОРВАТСКА) – У Старих Янковцох у Горватскей нєшка, 6. мая, будзе схадзка Шветовей ради Русинох/Руснацох/Лемкох (ШРРЛ), схадзка Шветового форуму младих (ШФМ) РРЛ, як и двох комисийох Шветового конґресу РРЛ – Ревизийней и Комисиї за културу.
На схадзкох спомнутих орґанох будзе слова о пририхтованьох за 14. Шветови конґрес РРЛ, односно 8. Шветови форум младих РРЛ, хтори од 29. юния по 2. юлий буду отримани у Осиєку, у Горватскей.
Спред Рускей матки (РМ) Сербиї и Форуму младих РМ на нєшкайших схадзкох буду присуствовац член ШР, предсидатель РМ Дюра Папуґа, член ШФМ, предсидатель Форуму младих РМ Борис Фейди, член Ревизийней комисиї ШК Юлиян Лазор и членїца Комисиї за културу ШК Мария Дорошки.
Домашнї схадзком Дружтво Руснацох у Републики Горватскей „Руснак”, а после зашеданьох, у будинку Општини Стари Янковци перше будзе стретнуце ШР РРЛ з Координацию рускей националней меншини Републики Горватскей, а на 18,30 г. културно-уметнїцка програма, на хторей участвую школяре котри у Янковцох виучую руски язик, Здруженє Мадярох з того места, члени спомнутого дружтва „Руснак”, Културне здруженє Русинох „Червена ружа” з Румуниї, як и соло-шпиваче зоз Закарпатя у України и поетове и рецитаторе зоз жемох-членїцох ШК РРЛ и ШФМ РРЛ.