ВЕРБАС – У Вербаше нєшка, 11. мая, будзе конститутивна схадзка нового зволаня Скупштини општини (СО), после локалних виберанкох хтори отримани 23. априла. Схадзка СО будзе на 10 годзин у сали за схадзки СО Вербас.
Як наявене у поволанки за схадзку, хтору зволал предсидатель Дочасового орґану Општини Вербас Милан Ґлушац, попри верификованя мандатох новим одборнїком, нєшка би мали буц вибрани предсидатель СО Вербас, його заменїк и поставени секретар СО.
Тиж так, предвидзени и вибор предсидателя Општини Вербас, його заменїка и вибор членох до Општинскей ради.
СО Вербас ма 36 одборнїкох, а на виберанкох 23. априла найвецей, 17 мандати освоєла Сербска напредна странка, 8 Социялистична партия Сербиї, 4 Коалиция „Ошлєбодзме Вербас”, 3 Рух социялистох и по два манадати Сербска радикална странка и ҐГ „Досц було”.