Отримана схадзка Орґанизацийного одбору „Коцурскей жатви”

автор ядю/апм
968 Опатрене

КОЦУР – Вчера вечар, у Руским доме у Коцуре, отримана схадзка Орґанизацийного одбору манифестациї „Коцурска жатва” хтора будзе отримана на пияток и соботу, 13. и 14. юлия. Схадзку водзел Микола Шанта хтори такой на початку похвалєл младих хтори вчера цали дзень ушорйовали двор Руского дому, а тих дньох буду ушорйовац и просториї Руского дому и Дому култури.

Гевто цо нове у тогорочней „Жатви”, то же на пияток млади тамбурови оркестер КУД „Жатва” у хторим граю пейцме хлапци хтори закончели шесту класу и младши, хтори почали грац вєшенї, на пияток буду мац премиєрни наступ. Ту и нови млади шпиваче, як и нови злучени оркестер КУД „Жатва” и КПД „Карпати”, а дзепоєдни програми ознова оживюю, та пиятокова програма будзе рижнороднєйша.

Перша програма у рамикох тогорочней манифестациї будзе вистава малюнкох зоз подобових колонийох и малюнкох на склу Гелени Хома зоз Нового Саду у Етно клубу „Одняте од забуца”, на пияток, 13. юлия, на 18 годзин. Виставу отвори Микола Шанта.

Потим на 18,30 г. почнє Литературни вечар поети Михала Рамача, тиж у Етно клубу, на хторим ше присутним през драмску сличку приблїжи Рамачову поезию, а и сам автор ше на пригодни способ представи публики. Кед хвиля дошлєбодзи, плановане же би тота подїя була у дворе Етно клуба, публика будзе мац нагоду коментаровац, поставяц питаня поетови, а у програми будзе участвовац и Мария Горняк хтора одрецитує даскельо Рамачово писнї.

У Доме култури на 20,30 г. будзе концерт коцурских младих шпивачох, а на 21,30 г. почнє „Тамбурованє”, дзе будзе поставена шкатула за пенєжну помоц Наташи Ґайдош и Желькови Шантови, та тота подїя будзе мац и гуманитарни характер.

Други дзень „Коцурскей жатви” на соботу, 14. юлия, почнє зоз традицийним придаваньом хлєба на площи опрез Руского дома на 17 годзин, дзе наступя дзецински ансамбли КУД „Жатва”, КПД „Карпати” и здруженя „Завичайно врело” – кажде з по єдну точку.

Потим на 17,30 г. у школскей физкултурней сали буду представени етно лакотки. Фестивалска и ревиялна програма у Доме култури почнє на 20 годзин, а потим будзе орґанизована вечера у Пелетовей сали у Коцуре.

У Пелетовей сали тиж будзе грац злучени оркестер „Жатви” и „Карпатох”, алє з помоцу и трецого – оркестра Любу Скубана. Музика будзе без озвученя, а буду грац на аж 10 инструментох.

У Коцуре ше тих дньох цали валал же уключел до пририхтованя манифестациї, а велї млади и старши валалчанє участвую у пририхтованю просторох дзе буду случованя. У Доме култури проби у розмаху, як и у Етно клубу, дзе вчера вечар тиж отримана проба учашнїкох у драмскей слички и рецитаторох.

Орґанизацийни одбор „Коцурскей жатви” поволал учашнїкох и госцох же би пришли на тоту традицийну манифестацию чийо отримованє помогли Општина Вербас, Покраїнски секретарият за културу, явне информованє и одношеня з вирскима заєднїцами, Покраїнски секретарият за образованє, предписаня, управу и национални меншини-национални заєднїци, Национални совит Руснацох, Амбасада України у Беоґрадзе, Месна заєднїца Коцур и привреднїки з валалу.

ПОВЯЗАНИ ТЕКСТИ