ВЕРБАС – З нагоди традицийней кампанї „16 днї активизму”, Комисия за витворйованє родней ровноправносци Oпштини Вербас, того тижня орґанизовала округли стол на тему зопераня насилства у фамелиї.
Свойо искуства, подаки и активносци у борби процив того зявеня, и о способе санированя пошлїдкох хтори церпи жертва насилства, винєсли представителє Полицийней станїци, Суду, Тужительства, Центру за социялну роботу, здравствених и образовних установох и други.
По податкох Центру за социялну роботу, за єденац мешаци у 2018. року евидентовани 114 случаї насилства у фамелиї, цо менєй у одношеню на 2017. рок. Як визначене, слово углавним о вецей файтох насилства – физичним, психичним и сексуалним, а од вкупного числа случайох насилства, 17 повторени.
Тенденция числа случайох насилства хтори евидентовали дохторе рошнє, бо 2016. року були 22 случаї, 2017. року 25, а у 2018. року то 27 случаї насилства.
Як и вше, найвекше число фамелийного насилства евидентовали фахови тими Полицийней станїци, хтори по 10. децембер зазначели 186 случаї насилства. Як сообщене зоз Полицийней станїци, у 141 случаю вирекнути нагли мири, а у остатнї мешац аж пейц особом одредзени притвор.