НОВИ САД – Конститутивна схадзка Роботного цела за забрану дискриминациї Координациї националних совитох Републики Сербиї отримана 4. октобра, а за його предсидательку вибрана Наташа Макаї Мудрох, членїца Националного совиту (НС) Руснацох.
Попри Макаї Мудроховей, члени того роботного цела ище Андрей Кубичек зоз ческого и Славица Девич зоз ромского националного совиту. Робота того фахового цела будзе провадзиц витворйованє правох припаднїкох националних меншинох у обласци дискриминациї, хтора єдна з 12 обласцох облапених у Акцийним плану Координациї националних совитох.
Национални совит Руснацох мал обовязку орґанизовац Конститутивну схадзку того роботного цела, та на нєй присуствовал и предсидатель Вивершного одбору НС Руснацох Желько Ковач, а схадзка отримана у просторийох Руского културного центру у Новим Садзе.
