БЕОҐРАД – За ваучери за одпочивок у Сербиї од початку рока по 28. май сцигли 45 502 вимоги, гваря у Министерстве тарґовини, туризму и телекомуникацийох, а преноши Танюґ.
З того числа 59,1 одсто вимогох поднєсли пензионере (26 897); 31,7 одсто заняти чийо приманя нє векши як 60 000 динари (14 435); 8,3 одсто прияви нєзанятих (3 788), док други катеґориї, медзи нїма и польопривреднїки, поднєсли 382 вимоги.
Найвекше интересованє гражданох за ваучери за одпочивок у Пролом банї, на Златиборе, у Луковскей банї и у Банї Ковилячи.
У ресорним министерстве наглашую же гражданом на розполаганю 765 погосцительни обєкти у хторих можу реализовац ваучери, а тоту лїстину ше ажурує кажди пияток и мож ю видзиц на сайту Министерства – www.mtt.gov.rs.
Приявйованє за хаснованє ваучерох за одпочивок у Сербиї, пре розвой домашнього туризму, почало з першим дньом того рока, за цо з буджету видвоєни 300 милиони динари. Гражданом на розполаганю 60 000 ваучери, кажди вредносци 5 000 динари, а мож их вихасновац по 20. новембер.