БЕОҐРАД – Републична виберанкова комисия (РВК) концом прешлого тижня сообщела же на предсидательних виберанкох 2. априла вибераче годни гласац и з особну леґитимацию хторей вицекол час, алє лєм з потвердзньом з МУП-у же порушали поступок за єй предлуженє.
Попри з важацу особну леґитимацию, вибераче можу гласац и з пасошом, лєбо вожацку дозволу – з документами на хторих єст єдинствене матичне число граждана.
Гласанє за предсидателя Сербиї 2. априла будзе од 7 до 20 годзин, а вибераче на хижни адреси достаню обвисценє з адресу свойого виберацкого места. Тото обвисценє су нє длужни ношиц на виберацке место – сообщене з РВК.
Вибераче котри пре здравствени причини нє можу пойсц на виберацке место, як и особи з инвалидитетом и стари нємоцни особи, гласац можу и дома, алє о тим до 11 годзин на дзень гласаня муша обвисциц свой виберацки одбор.