РУСКИ КЕРЕСТУР – У Школи „Петро Кузмяк” у Руским Керестуре всоботу, 27. мая отримане Републичне змаганє з руского язика и язичней култури за школярох основних школох котри руски язик виучую у порядней и виборней настави, на хторе ше пласовали вєдно 17-еро школяре – осмеро зоз седмей и осмей класи з ОШ у Руским Керестуре и Коцуре, дзе настава руского язика порядна, и дзевецеро школяре седмей и осмей класи зоз школох дзе ше руски язик виучує як виборни предмет.
На отвераню Змаганя школярох, наставнїкох и шицких присутних привитали секретар Дружтва за руски язик, литературу и културу Ирина Папуґа, предсидатель Скупштини Дружтва др Юлиян Рамач, предсидателька Одбору за образованє Националного совиту Руснацох Мелания Римар и директорка керестурскей Школи Хелена Пашо Павлович котра, медзи иншим, школярох поволала же би свойо школованє предлужели у керестурскей Ґимназиї по руски, наглашуюци значносц очуваня мацеринскей бешеди.
У конкуренциї седмих класох у катеґориї школярох котрим руски порядни язик перше место освоєл Леон Юрич з Керестура, друге Єлена Чордаш з Коцура, а треце Александар Киш з Керестура. У истей катеґориї у конкуренциї осмих класох перше место завжал Давор Хома, друге Теодора Новакович, обидвойо з Керестура, а треце место подзелєли Соня Балїцки з Керестура, Емануела Горняк и Александра Русковски з Коцура.
У катеґориї школярох котри руски язик виучую як виборни предмет перше место освоєла Наташа Джуджар з Нового Саду, а друге место подзелєли Каролина Гарди и Лука Вуячич (обидвойо з Нового Саду) и Анастасия Джуджар з Кули. Треце место освоєли пецеро школяре – Божидар Загорянски з Бачинцох, Матияс Гуняди з Бачкей Тополї, Орши Олаи з Нового Орахова, Павле Медєши з Вербасу и Страхиня Сакач з Ветернику.
По законченю змаганя директорка керестурскей Школи Хелена Пашо Павлович школяром уручела кнїжки, а Ирина Папуґа подзекованя школяром и наставнїком котри их пририхтали, як и шицким котри участвовали у орґанизациї Републичного змаганя з руского язика.
Змаганє орґанизовали Министерство просвити, науки и технолоґийного розвою, Дружтво за руски язик, литературу и културу и Основна и штредня школа з домом школярох „Петро Кузмяк”, як домашня.