БЕОҐРАД – Родительски додаток за перше дзецко од идуцого року будзе 100 000 динари, а дзецински додаток за дзеци зоз завадзанями у розвою и инвалидитетом будзе звекшани за 50 одсто, гварел министер за роботу, обезпечованє роботи, борецки и социялни питаня Зоран Дьордєвич, наявююци законски вименки у Нарису закона о финансованю фамелийох з дзецми чийо ше прилапйованє обчекує по конєц рока.
Дьордєвич на медзинародней конференциї зоз назву „Укладанє до дзецох – добробут за шицки дзеци”, гварел же запровадзени мири хтори стимулую народзованє дзецох, а хтори предписую же надополнєнє за положнїцке дванацмешачне хорованє годни витвориц и жени хтори нє у роботним одношеню, як и тоти хтори окончую самостойну дїялносц, лєбо су анґажовани з контрактом о дїлу, лєбо з авторским контрактом.
-Держава видзелєла досц средства за реализацию правох хтори виходза зоз нового Закона, а у наиходзацих рокох попробуєме тото звекшац у складзе зоз финансийнима можлївосцами держави, гварел Дьордєвич и додал же держава на рочним уровню за дзеци видзелює 52 милиярди динари.
Министер визначел же у складзе з политику придружованя ґу Европскей униї, Сербия пошвецена борби процив худобства дзецох и звекшаню пенєжних видзельованьох за фамелию.