Кед пред 27. роками отримани перши Фестивал новей рускей народней шпиванки „Ружова заградка”, нє могло ше зоз сиґурносцу и прешвеченьом предвидзиц розмири и досяги того фестивала у музичней култури войводянских Руснацох.
– Перши шпиванки компоновани у народним духу – гвари Татяна Колєсар Ґвоїч, музична редакторка у Радио Новим Садзе – нашо слухаче дзечнє прилапели и на тот способ були инспирация велїм автором музики и текстох же би направели перши крочаї и же би з рока на рок напредовали и були вше лєпши и присутнєйши на рижних фестивалох. Тиж так през „Ружову заградку” повирастали и зашли до красних рокох и велї нашо солисти – здогадує ше Колєсар Ґвоїчова.
Дзекуюци велїм любительом нашей музики и традициї, тот Фестивал досягнул високи уровень на хторим є нєшка. И того року Фестивал реализую любителє красней рускей шпиванки. Тоту одвичательну длужносц и обсяжну роботу окончую заняти у Рускей редакциї (од хторей вше руша иницятива и перши крочаї у реализациї Фестивала), потим Музичней редакциї и продукциї Радио Телевизиї Войводини, зоз вельку потримовку руководства Радио Телевизиї Войводини.
– На нєдзелю, 5. марца, на 27. Фестивалє „Ружовей заградки” учуєме 14 нови композициї. Шицких солистох будзе провадзиц Студийска вокална ґрупа и Вельки народни оркестер под руководством Мичи Янковича. Як виводзаче єдней композициї, зяви ше и Хлопска шпивацка ґрупа РКЦ зоз Нового Саду, а после длугшого часу, на нашу радосц, ознова учуєме и Звонимира Кочиша. Того року, з оглядом на мале число композицийох, нє були зме у можлївосци анґажовац вецей младих шпивачох – гвари Колєсар Ґвоїчова.
Ревиялна часц пошвецена нашому познатому културному дїячови, Дюрови Латякови, на чийо тексти компоноване вельке число композицийох. Даєдни з нїх учуєме и того вечара у виводзеню познатих шпивачох.
Тогорочни 14 композициї дополнєли уж єден наисце богати музични скарб зоз 355 шпиванками 27 „Ружових заградкох”. Нє лєгко дацо отримац 27 роки, а окреме Фестивал, хтори за тоти роки часто творени лєм зоз ентузиязмом и любову аматерох и любительох рускей шпиванки.
– Треба вельо упартосци и роботи. У каждей заградки єст квитки хтори прекрасни, менєй красни, алє и спрети. Нє значи же пре тото заградку треба поґажиц. Чувайме и почитуйме тото цо маме. Поволуєме вас же бисце пришли на 27. Фестивал новей рускей шпиванки „Ружову заградку” же бисце дожили добри вибрациї хтори вам прейґ шпиванкох пошлю шицки учашнїки тогорочного Фестивалу – закончела зоз поволанку Татяна Колєсар Ґвоїч.