ШИД – Славица Дюкич Деянович, министерка без портфеля задлужена за демоґрафию и популацийну политику, вчера нащивела Шид.
Циль нащиви бул же би ше прешвечела же средства у виносу од 11 милиони динари, хтори у 2017. року додзелєни Општини Шид, потрошени у складзе зоз проєктами за хтори ше конкуровало.
Предраґ Вукович, предсидатель Општини, гварел же зоз тих средствох ришени проблем зогриваня у дзецинскей заградки, набавени 18 електро-бициґли за ґеронто ґаздинї, пейц малженски пари достали средства за штучне оплодзованє, а финансовани и учебнїки за школярох за треце и штварте дзецко у фамелиї.
Окрем Шиду, министерка истого дня нащивела и општини Сечань и Житиште, бо од 19 општинох у Войводини хтори конкуровали за средства, пейц их и достали.
Министерка Дюкич Деянович на концу нащиви наглашела же и у тим року буду опредзелєли средства за подобни намени.