ВУКОВАРСКО-СРИМСКА ЖУПАНИЯ – Прешлого тижня, штварток, 11. мая, пред приходом до Сербиї, двойо студенти Оддзелєня славистики на Педаґоґийним универзитету у Кракове, у Польскей, зоз свою професорку Олену Дуц-Файфер перше нащивели Руснацох у Горватскей, у Вуковарско-сримскей жупаниї.
Дополадня нащивели ОШ „Антун Бауер” у Вуковаре, Подручну школу у Петровцох и ОШ у Старих Янковцпх, дзе их привитали директоре школох Йоза Михалєв, Андєлко Лучич и руководителька Ясминка Будински, а потим ше стретли зоз школярами котри виучую руски язик и културу по моделу Ц и їх учительками Илону Грецешин и Наталию Гнатко и присуствовали на годзинох руского язика.
Попри Школи, госци з Польскей у Петровцох нащивели церкву Покрова Песвятей Богородици, дзе их привитал парох о. Владимир Седлак, Здруженє „Руснак”, дзе их дочекал його предсидатель Мийо Шайтош, як и Етноґрафску збирку Русинох, дзе им о виложених експонатох бешедовал аниматор култури Союзу Русинох у Горватскей Звонко Костелник.
У Вуковаре нащивели Городску библиотеку, дзе им представена литература руских авторох, а стретли ше и з членми Ради рускей националнй меншини Городу Вуковар, дзе им домашнї були предсидателька Ради Лела Дїтко, а спред Координациї рускей националней меншини РГ подпредсидателька Агнетка Балатинац.
Орґанизатор тей нащиви було Здруженє „Руснак” Дружтво Руснацох у РГ, соорґанизаторе руски оддзелєня у спомнутих ОШ, а сопокровитель Рада рускей националней меншини Городу Вуковар.