Студенти з Польскей у наших институцийох у Керестуре

автор маф
1.2k Опатрене

РУСКИ КЕРЕСТУР – Студенти Оддзелєня славистики на Педаґоґийним универзитету у Кракове у Польскей Каролина Новак и Петро Козмински, з руководительку Оддзелєня професорку Олену Дуц-Файфер, котри прешли викенд пребували у Сербиї, всоботу, 13. мая, нащивели нашо институциї у Руским Керестуре – Национални совит (НС) Руснацох, Музейну збирку, Оддзелєнє Народней библиотеки и Катедралну церкву, Дом култури, а вечар провадзели младежску представу „Боинґ-боинґ”.

У Националним совиту госцох привитали секретар Совиту Таня Арва Планчак,  предсидателька Одбору за образованє НС Мелания Римар и членїца НС, народна посланїца Олена Папуґа котри им представели роботу, компетенциї, як и дзепоєдни проблеми у роботи НС. Попри тим, Папуґова бешедовала и о заступеносци националних меншинох у парламентарним живоце Сербиї, а пренєсла им и свойо искуства з тей обласци, док Арва Планчакова, як о. д. директора Руского народного театру „Петро Ризнич Дядя”, накратко представела роботу и тей нашей институциї.

У керестурским Оддзелєню Народней библиотеки, дзе и шедзиско Секциї Дружтва за руски язик, литературу и културу, госцох прияли библиотекарка Мария Дорошки и предсидатель Секциї Владимир Дудаш. Дорошкова их упознала з историю читальньох и пестованя читательней култури у Керестуре.

З вирским животом Руснацох, историю и терашньосцу Катедралней церкви св. оца Миколая у Руским Керестуре госцох з Польскей упознал капелан о. Михайло Шанта, а нащивели и крипту у хторей поховани пейцме грекокатолїцки владикове. Госци потим нащивели и Дом култури, дзе их приял о.д. директора Йоаким Рац и представел им роботу тей установи.

Як домашнї, зоз студентами у на„иви спомнутим нституцийом були предсидатель Рускей матки Дюра Папуґа и педаґоґиня у Школи „Петро Кузмяк” Любица Няради.

ПОВЯЗАНИ ТЕКСТИ