КОЦУР – Коцурци, а можу ше уключиц и шицки заинтересовани з других местох, предлужую гуманитарну акцию з хтору ше збера пенєж за операцию очох школяра другей класи ОШ „Братство єдинство“ Желька Шанту з Коцура. Желько на операцию очох муши пойсц до Русиї, за цо му потребни 3 000 еври.
На нєдзелю 28. мая на 20 годзин у Доме култури будзе отримана гуманитарна програма, а место уходнїцох буду предавани ручни роботи коцурских школярох, по 100 динари, за помоц Желькови. Орґанизаторе тей гуманитарней програми коцурске здруженє младих „КУМ“ и ОШ „Братство єдинство“.
Коцурска Школа шицким школом у вербаскей општини послала поволанку же би ше уключели до акциї, а сама будзе орґанизовац гуманитарну журку за школярох, на хторей ше будзе зберац добродзечни прилоги. За тоту неману школяре и сами уж приноша пенєжи своїм учительом и оддзелєнским старешином.
До гуманитарней акциї ше уключели и други културни и спортски здруженя у Коцуре, та ФК „Искра“ на нєдзельовим змагню поставела шкатули до хторих патраче могли зохабиц добродзечни прилог, а гуманитарни концерт пошвидко будзе орґанизовац и КУД „Звичайне врело“.
Попри тим, у догварки з Месну заєднїцу Коцур, у шицких предавальньох СТР „Любоєвич“ поставени шкатули до хторих Коцурци можу охабиц добродзечни прилог за Желька.
Тиж так, и шицки людзе добрей дзеки, без огляду з хторого су места, поволани най ше уключа до тей акциї збераня пенєжу нєобходного за Желькову операцию, а донацию мож уплациц на жиро-рахунок Желькового оца: Тихомир Шанта, Банка Интеса: 160-5800101032234-53.