НОВИ САД – У Културним центре Нового Саду вчера, 16. мая, отворена манифестация „Днї України” и тирва по 23. май, а за тот час буду отримани трибини, округли столи, вистави, проєкциї українских филмох и рижни културни и туристични змисти.
Українци ше на отвераню „Дньох култури” Новосадяном представели з Параду „Вишивки”, хтора прешла од Дунайского парку по Културни центер Нового Саду, дзе шветочно пущени и балони.
Амбасадор України у Сербиї Олександер Александрович, як домашнї манифестациї, на єй отвераню привитал предсидателя Скупштини Городу Нового Саду Здравка Єлушича, помоцнїка городоначалнїка Нового Саду Александра Петровича, директорку Управи за економски розвой и туризем у Кабинету городоначалнїка Львова Наталию Бунда и директора Културного центру Нового Саду Бояна Панаотовича.
Отверанє з музику прикрашела Капела бандуристкиньох з Києвского институту музики Ґлиера, под руководительством Ирини Родионовей, а на початку манифестациї у Културним центре Нового Саду отворена и вистава „История одношеньох України и Сербиї”
Нєшка на „Дньох України” програмни змисти з назву „Києвска Рус и насельованє Сербох”, у рамикох хторих у Матици сербскей буду два програми – на 18 г. презентация кнїжки „Госцина велького княза”, а на 18,30 г. дискусия о українским язику. У Кинотеки Културного центру на 20 г. будзе приказани филм о Владимирови Велькому.
На ютре, 18. мая, буду змисти пошевецени духовним и културним вязом України и Сербиї у епохи ренесанси, дзе два програми буду и у нашей грекокатолїцкей церкви у Новим Садзе – „Дискусия о українскей церкви” и вистава иконох О. Задорожного. Обидва програми починаю на 18 годзин.