У Паньскей карчми догварени одход до Нового Саду

автор маф
1.1k Опатрене

На зашеданю Велькей народней скуптшни Сербох, Бунєвцох и других Славянох, пред сто роками 25. новембра 1918. року у Новим Садзе медзи 757 делеґатами  бул 21 Руснак. У керестурским висланстве бул и Петро Шовш.

З тей нагоди зме дошли до потомкох Петра Шовша, та ше на його участвованє у тей историйней подїї и на його особу и живот здогаднєме з його унуком Йоакимом Гардийом.

Йоаким дїда по мацери запаметал лєм як пейцрочни хлапчик зоз хторим, з мацеру,  жили у єдним обисцу. Но, о дїдови ше наслухал од його супруги, а своєй баби Ани, поготов у длугих жимских вечарох под руским пецом, кед єдина розвага були бешеди.  

У Шовшових ше часто бешедовало о фамелийней прешлосци, найвецей о дїдови Петрови. Дознал так Йоаким о дїдовим пребуваню у Америки, частих приходох до краю, друженю з Миколом Паньским у чиєй ше карчми  одвивал и тедишнї дружтвено-политични живот.

ДЕЛЕҐАТОХ ВИБРАЛИ У ПАНЬСКОГО

Йоаким Гарди

– Тоти приповедки ми аж и допили як малому, та сом, боме, досц и позабувал. Но, тото цо паметам, як баба гуторела, кед би нє було дїда Петра, нє бул би хто пойсц до Нового Саду на Скупштину. Гоч видзим же их було пейцме з валалу, но по бабових приповедкох, у Паньския ше три раз сходзели на пораду же би пойсц, алє ше нїхто нє сцел прилапиц и орґанизовац одход, та вец мой дїдо о тим одлучел. А дїдо, вецка, бул и у Беоґрадзе, бо после Скупштини у Новим Садзе, кед вигласане, шедали на ладю з музику, бечками пива, и пошло ше по Дунаю до Беоґраду преславиц присоєдинєнє. Мой дїдо бул таки же шицко сцел знац и нїч без нього нє прешло, та кед дацо кончел,  сцел покончиц до конца. Паметам лєм же дас о три днї пришол дому после шицкого – приповеда Йоаким памятки на дїда делеґата. На питанє кельо знал о дїдових мотивох же би потримал идею присоєдинєня, Йоаким одвитовал:

– Дїдо гуторел же нє сце же би його дзеци учели по мадярски як вон, бо под час Мадярскей и на драже ше мушело по мадярски бешедовац, нє лєм у школи. То и я паметам, ша ище пейдзешатих рокох старши людзе себе на драже ище вше по мадярски здравкали. Нє мож було по руски бешедовац, та дїдо гварел, най будзе и по сербски, и так нам є блїзши язик як мадярски. Так вон роздумовал и зато бул на тим же най ше идзе на Скупштину.

БАБА ПОЦЕРПАЛА

– Знам же як ше баба муштровала з дїдом Петром же є вше у Паньского. Вон бул главни у тим коло тей Скупштини и делеґатох, а дїдо ше з нїм спайташел. Гуторела баба же є вше лєм у Миколу, и там пенєжи ноши, а же го гевтот наведзе даґдзе, та ище даґдзе пойдзе до гарешту.  А ту од дому, два хижи далєй ма карчму. Но, вон вше лєм до Паньского одходзел, поцерпала моя баба – памета Гарди. 

ПЕТРО БУЛ И АМЕРИЦКИ МЕН

Нє зна наш собешеднїк кус вецей о улоги свойого дїда у тей историйней подїї, алє нам виприповедал и його животну драгу.

Петро бул народзени 1881. року од оца Янка и мацери Юлияни Провчи. Оженєл ше зоз три роки младшу Ану Хованєц, дзивку Янка и Юлияни Чизмар. Нє були маєтни, нє мали анї свою хижу, та ше Петро як и велї тедишнї млади хлопи без жеми одважел постац америцки мен. По Йоакимових словох до Америки пошол даґдзе коло 1910. року. Робел у Питсбурґу у найпознатших шветових челїчарньох, а виучел аж два ремесла – и за коваля, и за шлосера. Бивали там нашо хлопи вєдно и з краю, и з Русинами зоз Горнїци.

 – Дїдо у Америки бул можебуц осем роки, алє понеже бул нємирного духа за тот час даскельо раз и дому приходзел, кажди два роки, гоч супруга барз на то дудрала же потроши шицок пенєж.  Правда же сцел и покончел най и вона пойдзе зоз першу дзивочку цо мали, Олґу, народзену 1912. року. Уж єй було шицко порихтане и карта, и пошла до Бремену, одкаль мала шеднуц на ладю, алє ше од того путованя барз бала. Була кратковида, та кед пришла блїжей ґу ладї, так ше злєкла же гварела же на ню нє шеднє. И оддумала ше, гоч шицко було порихтане. А же би ше вигварела при мужови,  написала му же ю нє пущели пре очи, а теди и трахом пановал. Прето вон вше кед надумал приходзел дому. Року 1914.  народзело ше им и друге дзивче Мелана, то була моя мац, а 1917. мали и сина Владу. Баба му 1914. року писала най нє приходзи, бо ту будзе война,  а вон одвитовал же зна шицко цо ше ту случує, бо читаю новини.  Одвитовал єй же ше нє бої, же будзе конї ковац… Но, пришол уж 1918. року кед ше уж знало же будзе конєц войни – шведочи Йоаким.

Дакедишня Шовшова хижа

ЕКОНОМСКИ НАПРЕДОВАЛ

Врацел ше Петро дому з далєкого швета, змогнул ше материялно, алє и вироятнє преширел свойо попатрунки, дружтвени и политични. Як зме гварели, часто доходзел до Миколи Павловича хтори ше тиж змогнул у Америки, врацел ше и справел славну Паньску карчму, дзе знаме же була и перша валалска читальня, и дзе тедишнї напредни идеї зазберовали людзох.

После 1918. року Петро ше вецей до Америки нє врацал, зоз заробку купел парну машину и два трешки, з хтору услужно тлачел жито, а єдну и синови плановал. Робел и обидва свойо ремесла и добре ґаздовали. Справел и вельку хижу на Вельким шоре, високу, зоз амфор капуру и на другим боку з вельку шмикню же би до нєй и парна машина станула. 

– Теди таке було же ше людзе змагали хто векшу хижу справи, та и мой дїдо. Ровнали ше по словох єдного дїда же справи векшу од сушедовей, а таку же би у нєй могол з кочом обрациц. Но, людзе нє були свидоми же до такей височави нє мож було натопиц, та ше боме вжиме марзли. Так було и з нами, бо ми з мацеру бивали з дїдом и з бабу. И добре ше жило, бо дїдо робел обидва ремесла и видавал машини, а и зоз сином хтори ше оженєл вєдно робели. Но, кед пришла тота шветова економска криза, роботи було вше менєй, та шмикню видал фабрики Юти. Ґу тому ше и похорел, од швайзованя ошлєпнул на єдно око, а и на другим му вид ослабнул, бул и пукнути, та вше менєй могол робиц. Похорел ше  и  його син Владо од туберкулози, та ше лїчел,  а лїка нє було. Умар на 28 роки. Шицко тото подкошело дїда Петра. Док було пенєжи, баба го нагваряла най купи жеми, а вон як майстор о тим нє сцел чуц, та  го лєдво нагварела най купи ланц и ферталь. У кризи ше з того нє могло жиц, та надумали хижу предац и купиц меншу. Випадло так же ю 1947. мушели зачерац зоз Русовима Чизмаровима дакус далєй на Вельким шоре и ґу тому достали ище три ланци жеми, правда, штвартей класи и далєко од валалу, алє  иншак нє могло буц – докончує здогадованя Йоаким.

Нови животни обставини, економске назадованє, синова шмерц, преселєнє… озбильно потрошели здравє Петра Шовша. Нєодлуга, 1948. кед му було 68 роки, умар. Од троїх унукох од двох дзивкох, нєшка попри Якима од дзивки Олґи памятки на ньго чува и унук Йовґен Чизмаров.

За заробени пенєж Петро купел парну машину и два трешки

 

ПОВЯЗАНИ ТЕКСТИ