РУСКИ КЕРЕСТУР – З пригодну програму, у голу рускокерестурскей ОШ „Петро Кузмяк” вчера, 5. юния, означени два вельки ювилеї нашого часопису за дзеци – 80 роки од кеди вишла перша „Наша заградка” Михайла Ковача и 70 роки од виходзеня часопису за дзеци по Другей шветовей войни – „Пионирскей заградки”, нєшкайшей „Заградки”.
Програму отворела директорка Школи Хелена Пашо Павлович, котра наглашела же велї ґенерациї одросли зоз „Заградку”, та ю треба чувац, а очуваме ю з тим кед ю ґенерациї дзецох и далєй буду читац и до нєй писац. Присутних привитала и редакторка „Заградки” Мелания Римар, котра з тей нагоди и похвалєла шицки дзеци за уложени труд до писаня и рисованя за часопис, виражуюци надїю же спомедзи телїх дзецох о даскельо роки вирошню и прави писателє.
– Я пишем лєм за дзеци, бо дзеци прави и щири читаче, та вас модлїм пишце и ви, залївайце тоту нашу „Заградку”, най нє спреє – гварела Римарова.
Програму пририхтали дзеци од першей по пияту класу ОШ зоз своїма учительками и наставнїцу руского язика. Наймладши школяре шпивали и рецитовали писнї зоз „Заградки”, док старши виведли даскельо танєчни и драмски точки. Школярки пиятей класи читали власни писмени состави.
У школским голу пририхтана и вистава рисункох з тему „Заградка”, а виложени и велї прикладнїки того часопису, аж и перши, видати 1. септембра 1937. року.