РУСКИ КЕРЕСТУР – З нагоди 9. новембра, Медзинародного дня борби процив фашизму и антисемитизму, як и означованя рочнїци Битки на Батини, штирме Руснаци борци-ветеранє достали „Медалї побиди” Амбасади України. Указ о додзельованю медальох борцом котри ше борели вєдно з Трецу українску армию видал предсидатель України Петро Порошенко.
Медалї достали Йоаким Надь Митьов, Любо Варґа Пинтеров и Яким Дудаш Мийов з Руского Керестура и Янко Уйфалуши з Нового Саду, а медалї им вчера уручел амбасадор Укаїни у Беоґрадзе Олександер Александрович, у просторийох керестурского Каритасу.
Нашо борци-ветеранє, вєдно з борцами Трецей українскей армиї, у Другей шветовей войни участвовали у биткох на Батини, на Дунаю, на Болману, на Драви, и векшина з нїх свойо войованє закончела у Словениї.
Амбасадор подзековал борцом на їх доприношеню у борби процив фашизму, а подзелєл им и квитки червеного маку, хтори направели школяре з Индїї котри ходза на годзини пестованя українского язика.
З госцами з Амбасади у Керестуре бул и Яким Грубеня спред Союзу Руснацох Українцох Сербиї, а шицких привитали директор Националного Каритасу о. Владислав Варґа, керестурски капелан о. Михайло Шанта и предсидатель Вивершного одбору Националного совиту Руснацох Желько Ковач.
Госци обишли и катедрални храм св. о. Миколая и крипту у хторей поховани владикове.
