НОВИ САД – Пре подлу и пременлїву хвилю яка у остатнїм периодзе, мож обчековац чкоди на войводянских польох, як цо то уж случай у южних часцох Сербиї, дзе чкоди од каменцу аж и стоодстотни. Прето Покраїнски штаб за позарядово ситуациї апелує на локални самоуправи же би подписали контракти зоз штрелячами процивкаменцових ракетох.
Попри твердзеньох у медийох же у Сербиї нєт досц процивкаменцово ракети, командант Покраїнского штабу Мирослав Васин оценєл же процивкаменцово ракети єст достаточно. Як гварел, по радарских центрох у Войводини розподзелєни вецей як 1 900 ракети, а пошвидко би мали буц набавени ище 280.
Вельки проблем же дзепоєдни штреляче ище вше нє подписали контракти з Републичним гидрометеоролоґийним заводом, та нєт хто штреляц. Даєдни локални самоуправи тот проблем ришели так же за виштрельованє процивкаменцових ракетох обучели польочуварох, медзитим Покраїнски штаб апелує же би шицки локални самоуправи ришели административни проблеми и оможлївя защиту од каменцу.