РУСКИ КЕРСТУР − Шеста по шоре схадзка Совиту Месней заєднїци (МЗ) Руски Керестур, отримана вчера вечар, а на нєй представени Финансийни план за 2019. рок у складзе зоз додзелєнима апроприяциями з Буджету Општини Кула за чечуци рок.
Цалосни Финансийни план виноши 7 милиони 505 тисячи динари, а у нїм попри порядних трошкох, заплановани и значни средства за Спортску галу, понеже ришованє маєтно-правних одношеньох, дзе хаснователь постанє МЗ Руски Керестур, уж при концу.
Як потолковал предсидатель Совиту Владимир Олеяр, у плану же би ше зогриванє у Спортскей гали ришело по конєц фебруара, понеже АП Войводина пренєсла власносц на Општину Кула, Општина ю да на хасен МЗ, а потим будзе потребне лєм ришиц формалносци коло випитованя инсталацийох за зогриванє на ґаз.
Средства котри видвоєни за Спортску галу виноша понад 3,5 милиони динари, ту ураховане порядне отримованє и трошки, приключованє на систему зогриваня на ґаз, як и зогриванє, трошки за струю, плаци двоїм занятим − за домара и за пораєнє, и климатизацию сали дзе ше отримує рекреация за дзеци „Скочко”.
Цо ше дотика капиталних инвестицийох у Руским Керестуре за чечуци рок, вони заплановани зоз општинским буджетом, цо причина прецо су нє наведзени у Финансийним плану МЗ, о чим ше обчекує вецей информациї после Конститутивней схадзки Скупштини општини Кула 24. януара.
На схадзки прилапени и План явних набавкох за 2019. рок котри у складзе зоз Финансийним планом, а цо обовязка за шицко наведзене у Плану за цо на тарґовищу иснує конкуренция.