ШИД – Општинска рада (ОР) Шид на вчерайшей схадзки потримала одлуку же би ше конкуровало на конкурс покраїнского Секретарияту за польопривреду, водопривреду и лєсарство за средства за осучасньованє водовей станїци у Батровцох и подстанїцох у Шидзе и Кузмину за дезинфикованє води з хлороґеном, а вредноссц проєкту 3,9 милиони динари, без ПДВ, у чим учасц локалней самоуправи 20 одсто.
Тиж потримане и конкурованє за проєкт за автоматизованє студньох у Батровцох, дзе ше продукує воду, и тот проєкт вредни 12 милиони динари, без ПДВ. У тим би локална самоуправа мала участвовац з 20 одсто средствох.
На ОР прилапени план за реорґанизованє терашнього ЯП за квартельни услуги и будовательну жем, чийо компетенциї би превжали одзелєня Општинскей управи и ЯКП „Стандард“, а реформоване подприємство би ше старало о явним ошвиценю. О тим предлогу ше вияшнї Скупштина општини Шид, а нове подприємство би мало почац робиц од 1. децембра.
ОР прилапела и документ „Оценьованє загроженосци општини Шид од елементарних нєпогодох и других нєщесцох”, о хторим свойо думанє да Министерство нукашнїх дїлох, а потим и Скупштина општини. У нїм дати оцени загроженосци и мири хтори у таких ситуацийох треба преберац, а докумет представела Снежана Момирски (на фотоґрафиї), окончователь у Секторе за позарядово ситуациї.