МИКЛОШЕВЦИ – Швето Христового воскресеня грекокатолїцки вирни у Миклошевцох преславели по григориянским календаре, 5. априла, як и у других парохийох у Сриме и Славониї.
На Служби у церкви Рождества Пречистей Дїви Мариї на 10,15 годзин, попри домашнїх, присуствовали и госци з других местох, як и з Войводини, Босни, Швайцарскей. На Служби парох миклошевски и викар сримско-славонски о. Яким Симунович пречитал Вельконоцну винчованку владики крижевского, кир Николи Кекича, у хторей медзи иншим поведзенє:
– З Воскресеньом почина нова история людского роду, то початок нового живота по Христу и у Христу, побиднїком над Сотону, над шмерцу. Воскресенє представя фундамент нашей вири, дава нам надїю хтора ше виполнює у любови. Себе даровац другому у малженстве, у фамелиї и у дружтве – то сущносц християнства, жиц нє за себе, алє за другого. Христос, наш спаситель, дал нам найлєпши приклад.
По Служби у церковней порти пошвецени кошарки з пасхалним єдзеньом, та о. Симунович благословел коло 80 кошарки.
На Вельку ноц у Пишкуревцох, у церкви Велькомученїка Димитрия, Службу Божу на 8,30 годзин служел о. Иґор Сикора. Було седем особи и пошвецени два кошарки.
У церкви Святого Йосафата у Райовим Селу Служба Божа була на 11 годзин, а служел о. Владимир Маґоч, парох вуковарски и раєвоселски. Вон пречитал винчованку кир Кекича и пошвецел 7 паски. Того року на Служби було 40 особи, дзе и 9-еро дзеци, котри зоз шпиваньом возвелїчали вельконоцне дожице у штредку дзе єст вше менєй Руснацох.
