КУЛА − Вчера, 24. януара, отримана конститутивна схадзка Скупштини општини (СО) Кула, потвердзени мандати одборнїком и вибране нове руководство Општини. За предсидателя Општини вибрани Дамян Милянич, а за предсидателя СО Велибор Милоїчич.
Зоз першу схадзку, по вибор руководства СО, предшедовал найстарши одборнїк Слободан Раячич зоз лїстини Ґрупи гражданох „Критична маса”, потим предсидателька Општинскей виберанковей комисиї Невенка Рабренович представела резултати локалних виберанкох котри отримани 16. децембра 2018. року.
По виборних резултатох, спомедзи 37 мандатох, найвецей освоєла коалицийна лїстина Сербскей напредней странки и Союзу войводянских Мадярох „Александар Вучич − прето же любиме Кулу”, 26 мандати. Пейц одборнїцки места припадли лїстини „Социялистична партия Сербиї − Ивица Дачич”, штирох представнїкох ма лїстина Ґрупи гражданох „Критична маса”, а лїстина „Рух за обнову кральовини Сербиї” у општинским парламенту чишлї двох одборнїкох. Верификацийни одбор представел звит по котрим потвердзени шицки мандати.
Потим ше предлужело зоз вибором руководства СО, за предсидателя вибрани Велибор Милоїчич, на функцию його заменїци Зорица Демкович, а за секретара СО Милорад Вуксан. Тиж вибрани и члени Комисиї за мандатно-имунитетни питаня, як и Комисиї за кадрово, административни питаня и роботни одношеня СО Кула.
Дамян Милянич, дотерашнї директор ЯКП „Комуналєц” Кула, вигласани за предсидателя Општини Кула, котрого предложел предсидатель СО, а Кароль Валка за його заменїка котрого предклада сам предсидатель. Источашнє, на предклад Милянича формована и Општинска рада, у котрей Милош Данилович, Душко Кончар, Милорад Томич, Ливия Козма, Смиляна Вукелич, Наташа Станоєвич, Йоаким Надь зоз Керестура, и по функциї предсидатель и заменїк Општини. У складзе з тим, престал важиц мандат Дочасовому орґану Општини Кула, котри руководзел з Општину од кеди розписани виберанки.
Зоз ступаньом на функциї, одборнїцки мандат престал важиц Дамянови Миляничови и Карольови Валкови, а на мандат задзековали Марко Пешич и Никола Жежель, шицки зоз лїстини „Александар Вучич − прето же любиме Кулу”. З оглядом на таки обставини, на идуцей схадзки би требали буц потвердзени мандати новим штиром одборнїком з тей лїстини.
Под час павзи схадзки СО, отримана и перша кратка схадзка Општинскей ради, на котрей утвердзене, а потим прилапене и у парламенту, же место окончователя длужносци директора ЯКП „Комуналєц” зоз Кули будзе окончовац Марко Пешич.
Гражданох Руского Керестура у локалним парламенту представяю тройо одборнїки, зоз лїстини „Александар Вучич − прето же любиме Кулу” − Мария Шепински и Владимир Олеяр, и Весна Макаї зоз лїстини „Социялистична партия Сербиї − Ивица Дачич”. Пре задзекованє штирох одборнїкох, найвироятнєйше же ище єден Керестурец будзе член локалного парламенту.