НОВИ САД – У Новим Садзе вовторок, 6. януара, рано була Служба Божа св. Василия Велького, а Всеночне на Вилїю, на 21 годзин предводзел наш еґзарх кир Георгий Джуджар. Сослужели о. др Роман Миз, парох новосадски о. Юлиян Рац и римокатолїцки священїки з церкви Мена Марийового о. Роберт Ерхард и о. Доминик Ралбовски.
После Всеночного у полней сали св. о. Миколая було друженє и колядованє, хторе на ґитари провадзел дзияк Йовґен Надь.
На Перши дзень Крачуна вчера дополадня була Служба Божа з мированьом, а пополадню Служба и у Будисави, тиж з мированьом.
На вчерайшей пополадньовей читаней Служби на 17 годзин пречитана Крачунска винчованка нашого еґзарха, кир Георгия, а потим парох новосадски о. Юлиян Рац шицким повинчовал Крачун.
– Мушиме кажди дзень глєдац Исуса, бо oд нього найбаржей завиши мир у наших шерцох, а вец ше тот мир будзе шириц и на других. Пред тим треба же бизме були достойни и же бизме служели Христови – гварел о. Рац.
По Служби було мированє, а дзеци, котрих пририхтали монахиня Георгия и вироучителька Мелания Римар, представели крачунску сличку з колядами и рецитациями. На концу шицки достали пригодни пакецики.
Нєшка, на Собор Богородици, Служби Божо з мированьом на 10 и 17 годзин, а исти розпорядок Богослуженьох и на ютре, на Треци дзень Крачуна.
На соботу, 10. януара, у новосадскей церкви на 9 годзин будзе Служба за погинутих у України, а на 14 годзин друженє старших и пензионерох у орґанизациї „Нашого Каритасу”.
