НОВИ САД – Вчера, на Перши дзень Велькей ноци, у Новим Садзе Архиєрейску Службу Божу предводзел апостолски еґзарх за грекокатолїкох у Сербиї владика Георгий Джуджар, а сослужели о. Роман Миз и о. Юлиян Рац. У своєй казанї преосвящени владика наглашел же бизме ше мали вешелїц и радовац же воскреснул наш Господ Исус Христос, бо то торжество над торжествами.
– Наша вира до воскресеня то найвекше богатство. Буц християн – то значи вериц з глїбоким прешвеченьом же Христос на себе вжал шицки грихи людзох и зоз шмерцу на крижу знїщел тоти грихи. Вон церпел за нас и место нас, же би нас ошлєбодзел од шмерци гриху. Вон надвладал шмерц и отворел уход до живота вичного, навики за нас. Кед славиме воскресенє, виражуєме надїю и до нашого воскресеня. „Хто вери, я го воскрешнєм” обецал нам Исус – гварел кир Георгий.
– Наш живот достал нове значенє. Воскресенє то побида шветла над цмоту, любови над нєнависцу и радосци над смутком. Основна характеристика каждого християна то радосц, и то ше од нас обчекує. Будзме шведкове воскресеня, най то видно у дїлох любови. Дзельме тоту радосц з нашима ближнїма. Най будзе щешлїве и благословене швето Воскресеня Господа нашого Исуса Христа и радосц у цалим швеце – гварел кир Георгий, котри потим пошвецел и числени паски у церкви.
На концу, дзеци винчовали владикови и паноцом Вельку ноц и придали им дарунки. Парох о. Юлиян Рац тиж винчовал Воскресенє и благословени швета, зоз жаданьом же бизме мали ратунок у нашей Церкви и пречитал обвисценє Инициятивней ґрупи за помоц вибеженцом у України.
