КУЛА – У рамикох Централней шветочносци означованя националного швета Руснацох, пред Архиєрейску Службу Божу у грекокатолїцкей церкви священомученїка Йосафата у Кули, всоботу у виронаучней сали церкви отворена вистава иконох о. Михайла Йосафата Гардия.
Виставу отворел ма Александар Мудри, котри и представел присутного автора о. Гардия. О. Йосафат Гарди по походзеню Керестурец, дзе є народзени 1948. року, алє и Кулянєц, дзе з родичами жил од 1950. по 1964. рок, кеди пошол на школованє за сващенїка.
О. Йосафат нєшка службує у грекокатолїцкей парохиї у Метлики у Словениї, хтора припада Крижевскому владичеству, дзе постал и од Министерства култури Словениї припознати иконописатель, а тиж пишє и поезию, малює, грає и шпива.
Свойо иконописанє присутним представел сам автор о. Гарди, а два музични нумери класичней музики виведли його унуки з Словениї – Миа Кочервар з Нового Места на кларинету и Сара Виторович Гарди на гушлї, з Мосте Полє.
На 17 годзин почала Архиєрейска Служба Божа у кулским храме, хтору предводзел наш апостолски еґзарх владика Георгий Джуджар, а з нїм сослужели дзешецме нашо священїки. Домашнї парох споведал, а служел и представитель монсиньор Янош Блаховяк, одправнїк роботох Апостолскей нунциятури у Сербиї.
На Служби були числени шестри служебнїци и вирни нє лєм з Кули, алє и госци з наших местох, котри присуствовали на центалней шветочносци нашого швета.
Євангелске читанє пречитал домашнї капелан о. Платон Салак, ЧСВВ, а цалу Службу шпивал Хор Дому култури и Катедралней церкви св. оца Миколая з Руского Керестура, под дириґенством Лидиї Пашо.
Преосвящени владика у казанї шицким повинчовал националне швето Руснацох, пожадал же би нас провадзел Божи благослов и зогаднул же нас Церква поволує жиц по християнских чеснотох, цо и тайна успиху нашого дотерашнього иснованя.
Владика наглашел же то єдина успишна драга хтору нам зохабели нашо предки, по нєй маме исц и старац ше же би була ровна и гладка.
