ШИД – Делеґация Националного совиту (НС) Руснацох, у хторей були подпредсидателька Совиту Наташа Еделински Миколка, предсидатель Вивершного одбору НС Желько Ковач и координатор Подручней канцелариї НС у Бикичу Деян Бобаль, вчера нащивела Општину Шид, дзе госцох прияли предсидатель Општини Никола Васич и началнїк Општинскей управи Ромко Папуґа.
У мено Совиту Желько Ковач подзековал предсидательови Васичови же локална самоуправа у Шидзе уж штири роки пораяднє сполнює финансийни обовязки спрам активносцох Руснацох у шидскей општини.
Бешедоване о култури, образованю и информованю Руснацох у шидскей општини, як и о можлївосцох финансованя роботи Подручней канцелариї НС у Бикичу.
Порадзене и же би ше запровадзело виучованє руского язика и на предшколским уровню, кед за тото буду витворени потребни условия.
Предсидатель Општини Шид Никола Васич обецал же локална самоуправа и надалєй будзе финансийно и на други способи потримовац активносци Руснацох у шидскей општини, як и робиц на унапредзованю одношеньох.
Желько Ковач з тей нагоди предсидателя Васича поволал на Централну преславу означованя националного швета Руснацох, нарок 16. януара у Кули, а домашнїх поинформовал и же 2017. року домашнї Централней преслави будзе Бикич.