ДЮРДЬОВ – У Основней школи „Йован Йованович Змай” у Дюрдьове вчера, на Дзень святого Сави, зоз шветочну програму означена школска слава. Пред програму, славски колач и колїво пошвецел дюрдьовски грекокатолїцки парох о. Йоаким Холошняй и православни парох о. Петар Дюкич, а потим пред святительовим образом запалєна швичка и ламани славски колач.
У духу швета, зоз шпиванками и рецитациями школяре виведли вецей точки. У програми участвовала и драмска секция з драмску сличку о св. Савови и шицким послата порука о важносци школованя. У програми участвовали и школски оркестер на пищалкох и два хори, так же одшпивана и святосавска гимна.
Школске швето шицким присутним повинчовала директора Школи Мария Тртич, як и спомнути священїки, а потим було друженє у школских просторийох.