НОВИ САД – Дружтвена одвичательносц єдна з главних порушовачох „Еґзиту”, цо причина витворйованя рижних проєктох хтори афирмую младих. Єден з таких то и конкурс „Млади героє”, на хторим вибрани найлєпши зоз своїх обласцох и буду представени як приклади другим, гварел директор „Еґзиту” Душан Ковачевич на вчерайшим стретнуцу з предсидательом Покраїнскей влади Бояном Пайтичом и секретаром за културу и явне информованє Славишом Ґруїчом.
Пайтич гварел же ше окреме цеши же ище од 2000. року потримує отримованє „Еґзиту”, хтори започал у историйних обставинох борби процив диктаторского режиму и борби процив нєшлєбоди, а и тераз ма значну улогу.
Ковачевич подзековал Пайтичови на длугорочней потримовки, хтора допринєсла же би Фестивал достал числени награди, як цо найновша – за найлєпши фестивал и дестинацию.