НОВИ САД/ДЮРДЬОВ – Канцелария за инклузию Ромох АП Войводини пияток, 8. априла, на Медзинародни Дзень Ромох, у Влади Войводини додзелєла и припознаня за успишне дзешецрочне сотруднїцтво и допринос у процесу интеґрациї и унапредзеня положеня Ромох у Войводини. Припознанє достала и ОШ „Йован Йованович Змай” з Дюрдьова.
Припознаня уручел директор Канцелариї и предсидатель Совиту за интеґрацию Душко Йованович, а з тей нагоди директорка Школи Мариї Тртич наглашела же дюрдьовска школа – инклузивна.
– Намагаме шє помогнуц дзецом з марґинализованих ґрупох, нащивюєме их у їх обисцох и закладаме ше за их правилни розвой. Маме и образованє за одроснутих, медзи котрима найчишлєнша ромска поулация, а ромски язик ше у нашей школи виучує дзешец роки – гварела директорка Мария Тртич.
За тото припознанє дюрдьовску ОШ предложел наставнїк ромского язика у тей школи Дьордє Фан.