РУСКИ КЕРЕСТУР – Здруженє паприґарох Руского Керестура того и прешлого тижня за своїх членох орґанизовало два едукативни нащиви, а представителє Здруженя участвовали и на єдним преподаваню у Министерстве польопривреди.
Прешлого тижня, 26. фебруара, 35-еро члени Здруженя паприґарох у Беоґрадзе нащивели Саям „Аґромаркету” з Краґуєвцу, подприємства з хторим паприґаре сотрудзую уж даскельо роки, а хторе як спонзор потримує и Днї керестурскей паприґи.
Того тижня, 1. марца, 25 члени Здруженя були и у Мужлї, у подприємстве „Царска заграда”, хторе у пластенїкох, склєнярнїкох и на отвореним продукує рижну желєняву, реґистрованє є и за увоз и вивоз желєняви и овоци. Керестурци сотрудзую и з „Царску заграду”, понеже прешлого року одкупйовала їх паприґу, а порадзене же то будзе и тей сезони.
У Мужлї члени Здруженя мали и приєм у Месней заєднїци, як и розгварку з директором „Царскей загради” Дюлом Мадарашом.
Исти дзень, 1. марца, на поволанку Здруженю з Министерства польопривреди, член Управного одбору Здруженя паприґарох Радован Беґович у Беоґрадзе присуствовал на представяню вецей проєктох з назву „Науково-виглєдовацки проєкти у обласци польопривреди”.