РУСКИ КЕРЕСТУР – Школяром другей класи ОШ „Петро Кузмяк” Еколоґийни рух „Желєни персцень” з Руского Керестура вчера на пригодней шветочносци у Доме пензионерох подзелєл древка пауловниї, у рамикох другей часци тогорочного означованя Дня планети Жеми.
Присутних школярох и їх учительки, родичох, дзеци з дзецинскей заградки, та представительох Месней заєднїци, Здруженя пензионерох, парохиї и других почитовательох Еколоґийного руху привитала його предсидателька др Леона Доротич Ґутеша.
Вона дзецом наглашела же би кажди рок посадзели по єдно древко пре свою и будучносц планети, а акцию пояшнєла и предсидателька Управного одбору „Желєного персценю” мр Лиляна Соколова, котра визначела же ше того року Дзень планети означує у знаку ожелєньованя.
Пригодну програму пошвецену еколоґийним темом симпатично виведли дзеци з предшколскей ґрупи дзецинскей заградки „Цицибан”, хторих пририхтала вихователька Емилия Костич.
О тим як треба посадзиц пауловнию потолковал Юлиян Регак, з чийого розсаднїку Еколоґийни рух обезпечел саднїци пауловниї, а „Желєни персцень” дзецом подзелєл и писане толкованє о тим новим древу на наших просторох.
