На тогорочней Манифестациї „Днї керестурскей паприґи” окремну увагу прицагла демонстрация пирсканя паприґи на отвореним полю зоз дроном. На оглядней парцели поверхносци 1,5 гектари окончене пирсканє зоз дроном, а присуствовало значне число польопривреднїкох, як зоз валалу, так и госци зоз околних местох.
На атрактивни способ приказани сучасни технолоґиї котри вше баржей пренаходза свойо место як у польодїлскей, так и у заградкарскей продукциї, дзе швидкосц, прецизносц, безпечносц людзох и рационалне хаснованє препаратох постали важни фактори успишней продукциї. Виход на польо у рамикох Паприґарияди бул орґанизовани после даскелїх рокох прерви, а то праве тото цо найбаржей хибело парастом, и то такой всоботу рано, 22. юлия. Док ше у центру валала пририхтовало перши єдла у котлох, зацикавени парасти ше вибрали до хотара випровадзиц пирсканє зоз дроном. Велька предносц же ше пирсканє зоз дроном роби зоз воздуху, та механїзация нє муши ґажиц през польо, цо значи же мож пирскац и у културох котри високи, як и после дижджох кед вельке блато.
Присутни мали нагоду видзиц як роби дрон и поровнац зоз пирсканьом зоз обичнима пирскачками яки ше хаснує у валалє. Затераз у Руским Керестуре нєт купени анї єден дрон, гоч ше бешедує медзи парастами же єст заинтересованих. Дрони за пирсканє нє тунї. Менши модели коштаю медзи 7.000 и 10.000 еври, док озбильнєйши модели зоз комплетну опрему медзи 18.000 и 25.000 еври. Предносц купованя у тим же ресорни покраїнски секретарият и републичне министерство по конкурсох софинансую таки инвестициї.
Пирскачки стоя у шопох
Пирсканє зоз дроном окончело подприємство „Agro aero” зоз Зомбора котре уж два роки роби у Сербиї, а идею за таки бизнис принєсли зоз України дзе тиж мали реґистровану фирму и за собу штиророчне искуство.
Як визначел Максим Щипак спред „Agro aero”, пирсканє зоз дроном ма вецейнїсти предносци, насампредз прето же особа котра пирска нє уходзи до поля, же ше нє ґажи зоз трактором и пирскачку польо, и же му прецизносц наисце велька, а шицко мож окончиц барз швидко и зоз гет меншим количеством.
– Наша фирма пришла зоз України, до Сербиї зме принєсли нашо дрони, оцаринєли их и тераз робиме ту. У України зме робели коло 4 роки, дзе ше уж шицки поля пирска зоз дронами. Польопривреднїки котри маю пирскачки тиж прешли на пирсканє зоз дронами, а пирскачки стоя паркирани у шопох. Пирсканє зоз дронами швидше, квалитетне и туньше. Гоч и маце свою пирскачку, заш лєм туньше заплациц услугу зоз дроном, бо нє трошице час и нафту, троши ше менєй препарати и менєй води, а цо найважнєйше, чува ше здравє особи котра би иншак пирскала зоз трактором и була у штред хемийних препаратох у полю – потолковал Щипак.
Дрон роби шицко сам. Прецизносц му коло 20 центиметри, кед ше добре вимапирує польо, вец вон сам приходзи на полнєнє и лєм ше враца до роботи. Особа котра управя з нїм потребне же би з часу на час препатрела дизни, або заменєла батерию, алє знова треба наглашиц, на релативно безпечней оддалєносци од поля котре ше пирска.
– Дрон може зробиц третман зоз минимум 5 литри по гектаре. Зоз дроном нє треба вельо води, понеже його дизни випирскую мали микро капки котри цалком иншаки од капкох зоз обичних пирскачкох. Капка велькосци коло 100 микрони, а главне же дизни на дрону под самим пропелером, и прето ше препарат цалком рознєше на наисце мали часточки и дойдзе на лїсце рошлїни зоз обидвох бокох. Прето мож повесц же то квалитетни третман – гвари Максим Щипак.
У Сербиї польопривреднїки почали хасновац дрони вше частейше. Їх подприємство роби уж други рок и, як потолковали, маю стаємних клиєнтох на чийо поля ше врацаю вецей раз у сезони, и з рока на рок окончую шицки пирсканя. Попри тим, присутни польопривреднїки дзечнє ше випитовали о детальох же цо мож шицко робиц зоз дроном, та зме дознали же мож пирскац и вяри зоз гербицидами, пирскац зоз десикаторами, гашиц огнї, алє и же найчежше у овоцнїкох.
– Мож пирскац и зоз гербицидом, алє условиє же би вообще нє було витру. Патриме же бизме то робели на векших парцелох, одцагуєме ше од сушедовей култури кед же є иншака, алє цалком удатно мож опирскац и зоз гербицидом ярнї култури од коровчох. Идеално пирскац парцели велькосци 20–30 гектари, робиме и зоз десикаторами, и то цалком удатни третмани. Благи витор 3–4 м/с нє завадза, а кед же векши витор, вец ше нє пирска зоз дроном. Практикуєме пирскац вечарами, кед нєт витру и кед нїзша температура, цо у складзе и зоз препорученями за хаснованє шицких препаратох. Дрон мож прилагодзиц и витру, зменша ше висину пирсканя и зменша ше швидкосц лєценя. Иншак, у нормалних обставинох, найвисше може буц 4,5 метери, а пирска ширину 9 метери з єдним преходом. Найидеалнєйше нам на вельких поверхносцох, наприклад за 10 годзини дрон може опирскац аж 150 гектари на єдним месце – заключел Щипак.
Кельо то шицко кошта
Мапиранє парцелох и пирсканє уходзи до цени. За мапиранє єдней парцели им потребне коло 10 минути, без огляду чи то мала, чи векша поверхносц. И, кед ше раз вимапирує даєдну парцелу, за кажди идуци третман тото мапиранє запаметане. Цена третману виноши 25 еври по гектару, то якаш штредня цена. Найдрагше пирсканє овоцнїкох, бо то компликованше. У овоцнїку ше муши хасновац вельо вецей води, и нє мож так класично вимапировац парцелу же би дрон робел автономно, и там ше зоз дроном муши управяц у каждим шоре. Окрем пирсканя, вони зоз їх дронами помагали гашиц огнї на депонийох у Зомборе и Червинки.
Присутни польопривреднїки ше зацикавели за таки способ хаснованя хемийних защитних средствох и после оконченого пирсканя дискутовали и випитовали ше о предносцох котри приноши пирсканє зоз дроном.
Пирсканє зоз дроном було на ярашу на паприґи Бориса Медєша котри того року ма посадзене гектар и пол паприґи на двох парцелох – на єдней червену рогову, а на другей бабуру и парадичову паприґу.
Як визначел Медєши, паприґа би могла буц лєпша, медзитим, и по його словох и по словох фаховцох, тот продукцийни рок нє бул идеални, и нє було лєгко випестовац паприґу. Попри тим, вон уж на даскельо заводи пирскал паприґу зоз дроном и видзи же то велька предносц.
