Закончени роботи на турнї Катедралней церкви

автор маф
1.1k Опатрене

РУСКИ КЕРЕСТУР – После вецей як мешац и пол роботи на обнови турнї Катедралней церкви св. оца Миколая, прешлого тижня зняти алаши на хторих робели роботнїки подприємства „Слован” зоз Селенчи, а у орґанизациї керестурского подприємства „Изґлед”.

Як було плановане, на турнї цалком обита скорейша фасада и малтер, турня омалтерована з квалитетнима материялами и обилєна на било. Офарбени и штири облаки и заменєни мали облачок на луку. Поробене и вецей як плановане, бо обновени и лук под турню у преднєй, уходней часци до Катедрали.

4-Turnja-02

Як Рутенпрес дознава од керестурского пароха о. Михайла Малацка, шицки роботи на турнї, як и скорей закончени у олтаре, вєдно коштали коло 14 000 еври, а поробене вецей бо подароване вецей пенєжу.

За спомнути роботи наменски достати 400 000 динари од Канцелариї за одношеня з церквами и вирскима заєднїцами при Министерстве правди, а вельку суму подаровали понад 100 керестурски фамелиї и поєдинци, медзи нїма и котри жию у иножемстве.

ПОВЯЗАНИ ТЕКСТИ