СЕРБИЯ – Коло 108 000 заняти у просвити у другей половки новембра достаню єднократну помоц, а висина помоци будзе предмет розгварки премиєра Александра Вучича и чолнїкох синдикатох на пондзелок, 2. новембра, сообщели вчера представителє просвитних сидикатох, а преноши Танюґ.
Помоц би мала буц виплацена медзи 20. и 30. новембром, а синдикати глєдаю винос до єдней плаци, гварене на конференциї чолнїкох штирох репрезентативних синдикатох образованя и наведзене же то догварене позавчером и вчера, у розгварки з представителями Влади Сербиї.
Предсидатель Синдикату образованя Сербиї Бранислав Павлович гварел же за просвитних роботнїкох барз важна єднократна помоц, бо страцели од 30 000 до 60 000 динари на рочним уровню, пре зменшанє плацох у рамикох владових мирох шпорованя.
Бешедуюци о Законє о платних класох предсидателька Униї синдикатох просвитних роботнїкох Сербиї Ясна Янкович гварела же у тексту, хтори на явней розправи, нєт того цо синдикати предкладали и же одредзени ґрупи занятих у явней управи нє облапени зоз законом.
Тиж так, синдикалци указали и на розширену корупцию у образованю, и то медзи директорами школох, котри „чуваю места” и нє сцу дац роботу особом з лїстини технолоґийних звишкох.
Представителє штирох репрезентативних синдикатох просвитних роботнїкох вчера орґанизовали штрайк спозореня, та у векшини школох у Сербиї нє були отримани перши годзини у обидвох зменох.