РУСКИ КЕРЕСТУР – За секретара Месней заєднїци (МЗ) Руски Керестур вчера вечар вибрани дипл. инж. електротехнїки Михайло Сабадош (1963) з Руского Керестура.
При виборе секретара Совит МЗ на вчерайшей схадзки розпатрал три прияви хтори сполньовали условия дати з Явну оглашку, спомедзи штирох кельо сцигли на конкурс. Пред вчерайшу схадзку Совиту, прияви розпатрала Конкурсна комисия Совиту.
Попри вибраного Сабадоша, на Оглашку за секретара МЗ конкуровали Владимир Малацко (1963), дакедишнї директор Дому култури, Славко Малацко Сачи (1965) и Яким Дудаш (Семанов, 1986), чия приява нє розпатрана понеже нє була подполна пре нєдостаток рок потребного роботного искуства.
На вчерайшей схадзки присуствовали 13 члени Совиту и з явним гласаньом за вибор Михайла Сабадоша гласали 12, єден глас достал Владимир Малацко, док Славко Малацко нє достал гласи. На тоту одлуку постої право жалби, та постанє полноважна о 8 днї од єй приношеня.
На вчерайшей схадзки за шефа рахунководства у Служби МЗ з 9 гласами за, 2 процив и 2 стриманима дочасово, по врацанє роботнїци з положнїцкого одскуства, вибрани Владимир Сопка.