Вербащань Славко Папуґа приватну праксу почал ище пред 20 роками, а пред тим бул заняти у фабрики статкарскей поживи „Витамикс”. Приватну роботу порушал зоз пайташами, вєдно ше почали интересовац за автокломферию и продукцию авспухох, а нєшка є уж познати и припознати у тим фаху.
Єден час робел и жем, а тераз ше найвецей занїма у своєй роботнї дзе роби по цали дзень.
– Окрем з Вербасу, мам клиєнтох з Фекетичу, Коцура, Равного Села, Бачкого Доброго Поля, Бечею, и можем повесц же людзе уж надосц упознати з мою дїялносцу. Роботи єст вецей кед хвиля красна, можебуц вжиме и у фебруару єст найменєй, алє гевти други мешаци сом анґажованши – гвари Славко.
За тоти два децениї кельо роби, вибудовал себе одвитуюции просториї и купел потребни машини.
Окрем тей роботи, Папуґова фамелия пред трома роками ше почала занїмац и зоз пчоларством, то им ше попачело, та збогацели свой фонд и нєшка маю 25 кошнїци.
– И я и супруга ориєнтовани ґу природи, прето нам ше робота з пчолами барз попачела и маме намиру розвивац ю и далєй. Тих дньох ми, зоз Здруженя пчоларох и Здруженя ловарох, полєшуєме з баґреном дзепоєдни часци Вербасу. Занїманє зоз пчолами то цошка прекрасне, и цалком войдзе до креви. Ище вше су нам ту, а докмало их будземе селїц на Фрушку гору – бешедую Славко и його супруга Драґана, а до тей роботи ше помали уключує и їх син Александар. Тераз з яри, кед одселя пчоли на Фрушку гору, вец маю и активни викенди у природи.
Папуґово тераз повекшую фонд пчолох, предаваю мед и прополис, а понеже Славко ма и вельо роботи у роботнї, їх роботни дзень длуго тирва.
