КОЦУР – Всоботу, 24. януара, аматере КУД „Жатва” зняли видео-приказ руского облєчива и танцох. За знїманє була задлужена РТВ Войводини, а робота тирвала цали дзень.
ЦД-и зоз знїмками буду приложени ґу кнїжки „Танци, обичаї и облєчиво бачванско-сримских Руснацох”, як єдного з капиталних дїлох Заводу за културу войводянских Руснацох.
Як за Рутенпрес виявел єден з учашнїкой на витворйованю того проєкту Заводу хореоґраф Микола Ґубаш, ЦД-и буду визуелни приказ описаного у кнїжки, як першей такей файти при Руснацох на тих просторох.
Знїманє провадзели и предсидатель Националного совиту Руснацох Славко Рац, його заменїк Йовґен Мудри и директор Заводу за културу войводянских Руснацох Серґей Тамаш.
