КУЛА – Фестивал фолклорних традицийох Войводини, Панонски вашар, хтори пошвецени очуваню и промоциї народней традициї и културного скарбу Войводини, отримани всоботу и внєдзелю, 19. и 20. септембра у дворе Основней школи „Иса Баїч”.
Першого дня, всоботу 19. септембра, у першей часци 46. Фестивалу фолклорних традицийох Войводини перша наступела Женска шпивацка ґрупа Дома култури Руски Керестур, хтора под руководством Еуфемиї Планкош одшпивала два шпиванки. Народни оркестер „Юлия Рамач Чамо” Дома култури Руски Керестур, под руководством Кристияна Нярадия одграл и одшпивал єдну шпиванку, а потим ше публики представела и Хлопска шпивацка ґрупа зоз двома шпиванками.
Другого дня, внєдзелю 20. септембра, у рамикох 16. Фестивала дзецинских жридлових ансамблох на бину вишли наймладши члени КУД „Петро Кузмяк” зоз Нового Орахова и у провадзеню тамбуровей оркестри одшпивали єдну шпиванку. Фахови руководитель бул Борис Маґоч, а руководитель оркестра Золтан Дудаш. Ораховчанє ше представели и у другей часци 46. Фестивалу фолклорних традицийох Войводини, зоз наступом Мишаней шпивацкей ґрупи.
Истого вечара наступела и Женска шпивацка ґрупа РКУД „Др Гавриїл Костельник” зоз двома шпиванками, под руководством Еуфемиї Планкош, як и Хлопска шпивацка ґрупа зоз єдну шпиванку и фаховим руководством Александра Планкоша.
Фестивал орґанизовали Союз уметнїцкей творчосци аматерох Войводини и Општина Кула, з помоцу Министерства култури Републики Сербиї и Покраїнского секретарияту за културу, явне информованє и одношеня зоз вирскима заєднїцами.
