РЕЧИЦА – Фолклорна ґрупа ветеранох Руского културного центра (РКЦ) зоз Нового Саду, за викенд, всоботу 19. септембра участвовала на Стретнуцу ветеранох и рекреативцох Ветерани игром круже, да играмо што дуже у Речици у Браничевским округу.
Речица место у општини Пожаревац дзе на Стретнуцу ветеранох и рекреативцох привитани и ветеранє зоз РКЦ. Окрем новосадянох на отвореней бини Дома култури у Речици зменьовали ше учашнїки през дзешец точки, а окрем Новосадянох участвовали и члени КУД Ресава Пруґово, КУД Потайница Селиште, КУД Брадарац Брадарац, КУД Штуле Волуя, КУД Младост Поляна, домашнього КУД Речица як и писатель Драґан Радосавлєвич, хтори бул и модератор манифестациї.
Ветеранє РКЦ наступели зоз хореоґрафию Раковецки кручени танєц, руководителька Марияна Мункачи-Сивч.
Орґанизаторе Стретнуца привитали госцох зоз танцом, музику и закуску у Доме култури. Цале пополаднє було приємне стретнуце зоз вецейрочнима приятелями, а домашнї орґанизовали и забавни традицийни бависка у хторих участвовали и новосадски ветеранє. Шицки змагателє були успишни и нєзаоставали єдни за другима у швидкосци и схопносци у тих традицийних бавискох, та заслужено достали и красни дарунки.
После наступу фолклорашом порихтана заєднїцка вечера и друженє на автентичней ладї-ресторану Ана, хтора такой под Рамску твердиню на Дунаю.
