ВЕРБАС – У Ґалериї Културного центру у Вербаше, всоботу, 17. януара, у рамикох Централней преслави Националного швета Руснацох, отворена интересантна вистава нашого познатого подобового уметнїка Владу Нярадия, з назву „Карпатски мит”.
Инспировани з нашим горским, карпатским походзеньом и медведзом як националним символом, Няради през рижни подобово ситуациї витворел символични абстрактни колористични прикази у колажу, обробеним диґитализованим малюнку, на ютовим платну и паперу, у своїх креацийох похасновал аж и вишивки, як и древо и метал, а на каждим малюнку, лєбо предмету и символ медведза, хтори прераста до „руского бренду”.
Шицких присутних на отвераню вистави привитала вербаска подобова уметнїца Ґорана Бильня, а о Нярадийовей творчосци бешедовал подобови критичар мр Данило Вуксанович, котри, источашнє и отвераюци виставу, медзи иншим, гварел:
– Няради творитель и креатор нємирного духу, прихильни виглєдованю, при котрому малюнок, фотоґрафия, редимейд, диґитална слика, обєкт и вельо того ище, подєднак важни кед будує свойо визуални цалосци. У найновшим циклусу роботох Владо Няради ошлєбодзує порушуюцу енерґию през национални символ Руснацох, а то цмочервени медведз, хтори ше находзи на правим боку гербу и хтори символ шицким Руснацом. Таки мотив отворел авторови ланєц варияцийох, хтори зоз собу ноши специфични характеристики и трансформує препознатлїви символ.
Сам автор Владо Няради визначел же у родним Вербаше виклада после 20 рокох своєй роботи, а з тей нагоди предсидательови Националного совиту Славкови Рацови подаровал Мапу своїх ґрафикох „Карпатски мит”, зоз жаданьом же би у каждим нашим културно-уметнїцким дружтве була виложена даєдна з тих ґрафикох.
Вистава була барз нащивена, а на отвераню присуствовал и апостолски еґзарх, кир Георгий Джуджар. Виставу потримали Завод за културу войводянских Руснацох, Орґанизацийни одбор Централней преслави Националного швета Руснацох, Здруженє подобових уметнїкох Вербасу и Културни центер Вербас.
