РУСКИ КЕРЕСТУР/БЕРЛИН – На медзинародним сайму швижей и змарзнутей овоци и желєняви „Fruit logisticaˮ хтори отримани од 6. по 8. фебруар у Берлину, участвовали вецей як 3 000 викладателє зоз коло 100 жемох и реґийох, медзи хторима и Землєдїлска задруґа „Керестурска паприґаˮ.
Спред Задруґи на сайме були Желько и Андреа Оросово, а хтори поволанку на саям достали од Розвойней аґенциї Войводини.
У орґанизациї Розвойней аґенциї Войводини, на заєднїцким штанду представели ше вкупно осем компаниї хтори ше занїмаю зоз продукцию и предаваньом овоци и желєняви.
Як за Рутенпрес гварели Оросово, на сайму мали нагоду черац искуства и совити о способе продукованя паприґи, як направиц добри продукт зоз нєй и як го пласовац на тарґовище.
На сайму, од коло 25 галох, у трох галох були представяни держави, ткв интернационални гали, а у других галох викладателє були подзелєни по продуктох хтори викладали – овоц, желєняву, залївни системи, пластенїки, польопривредну механїзацию, системи защити и отримованя и друге.
У делеґациї Покраїнскей влади на берлинским сайму були и покраїнски секретар за польопривреду, водопривреду и лєсарство Вук Радоєвич, директор Розвойней аґенциї Войводини Никола Жежель и шеф Сектора за промоцию у Розвойней аґенциї Войводини Оливера Ковачевич.
