РУСКИ КЕРЕСТУР – Парохиянє керестурскей парохиї св. Оца Миколая з Архиєрейску Службу Божу и пошвецаньом пасхалного єдзеня вчера преславели Перши дзень Велькей ноци – Пасхи, а пред тим, соботу вноци, з богослуженями припомнути чин Христового воскресеня.
Вчерайшу Службу Божу предводзел владика Георгий Джуджар з домашнїма священїками – парохом о. Михайлом Малацком и капеланом о. Владимиром Медєшом, а на Служби шпивал домашнї Мишани хор, под руководительством Лидиї Пашо. Апостол читал дзияк Янко Виславски, а євангелске читанє владика и священїки читали на шейсцох язикох, як то традиция на Пасху.
Винчуюци тото найзначнєйше християнске швето, преосвящени владика пожадал шицким вирним же би ше наполнєли з воскресну радосцу и ношели ю своїм ближнїм и вшадзи там дзе єй нєт.
На концу Служби у порти катедралней церкви пошвецени кошарки з пасхалним єдзеньом, а гоч парохиянох и їх госцох було досц вельо, упечаток же кошарки було менєй як други роки. Попри Керестурцох, на пошвецаню паскох були и Керестурци котри тераз жию у других местох и у иножемстве, як и госци з других местох.
У просторийох парохийного Каритасу вчера почала и Вельконоцна вистава писанкох и других ручних роботох, хтору пририхтали жени зоз Здруженя женох „Байка” и волонтере Каритасу. Вистава тирва и нєшка и ютре.
Нєшка, на Други дзень Пасхи, на шицких Службох будзе и мированє. Будзе и Дзецинска Служба на пол дванастей, а тиж и облїванє.
