Кирбай у Миклошевцох и златни ювилей о. Якима Симуновича

549 Опатрене

МИКЛОШЕВЦИ – На Малу Матку Божу, 8. септембра, у Миклошевцох преславени Кирбай, а у рамикох служби Божей означена и 50.рочнїца священства о. Якима Симуновича, дакедишнього миклошевского пароха.

Службу Божу, у церкви Рождества Пресвятей Богородици служел доц.др.сц. о.Тарас Барщевски, доцент на КБФ у Заґребу, зоз паноцами хтори поприходзели з вецей парохийох – о. Владислав Варґа, о. Владимир Еделински Миколка и о. Алексий Гудак зоз Войводини, ту були и о. Никола Ступяк, о. Владимир Седлак, о.Владимир Маґоч, о. Даниєл Хранилович, о. Олеґ Закалюк и домашнї парох о.Роман Ступяк и о. Янко Колошняї зоз Канади.

Апостол читал и цалу Службу шпивал миклошевски дзияк Антонь (Тонко) Лїкар, Евангелию читал о. Владимир Еделински Миколка, а наказовал о.Тарас Барщевски.

Скорей обходу коло церкви и читаня Евангелийох на шицки штири боки швета, владически викар заСлавонию и Срим,о. Владимир Седлак, обявел вирним же ше у парохиї означує вельку подїю – златни ювилей, 50 роки священства о. Якима Симуновича, длугорочно миклошевского пароха.

О. Яким Симунович народзени у Руским Керестуре, а там є и пошвецени за паноца 8. септембра 1971. року.

Вирни, вєдно з паноцами, паноцови Якимови Симуновичови, хтори пре здравствени причини нє могол буц на Служби, за шицки прекрасни роки хтори подаровал Миклошевчаньом, Церкви и Господу Богу, одшпивали Многая лїта и препоручели ше до його молитвох, а його вжали до своїх.

ПОВЯЗАНИ ТЕКСТИ