НОВИ САД – З буджету Автономней покраїни Войводини (АПВ) опредзелєни 13,3 милиони динари за програми и проєкти з обласци ровноправносци полох, а конкуровац можу орґанизациї цивилного сектору. АПВ будзе финансовац проєкти у штирох обласцох: защити женох од насилства, унапредзеню положеня женох у руралних штредкох, потримовки здруженьом женох, та у обласци едукациї о ровноправносци полох.
Учасц здруженьох и институцийох, односно орґанизацийох явного сектору у витворйованю Програми за защиту женох од насилства у партнерских одношеньох то єден з цильох конкурсу у обласи ровноправносци полох. Нєвладово орґанизациї, вєдно з институциями, маю направиц проєкт, реаґовац на случаї насилства, и зношиц одвичательносц за витворйованє проєкту. За єден проєкт з тей обласци АПВ видвої найвецей 250 000 динари.
За проєкт унапредзованя положеня женох у руралних штредкох мож достац найвецей 200 000 динари, а же би могло конкуровац, треба обдумац активносци хтори афирмую женски творительни потенциял, мотивую анґажованє женох у локалней заєднїци през едукативни, културни, гуманитарни акциї, та програми за економске змоцньованє женох.
Женски валалски здруженя тиж субєкти хтори АПВ препознава як значних ношительох дружтвених збуваньох. Понеже у туристичним понукнуцу Войводини вони найчастейше ношителє, або важни актере, Покраїна одредзела же здруженя женох годни достац 100 000 динари по проєкту.
По Конкурсу за злєпшованє орґанизацийних капацитетох цивилного сектору, односно запровадзованє програмох, сходох и едукацийох у облаци ровноправносци полох, буду видвоєни максимално 120 000 динари по проєкту.